चालू घडामोडी : १८ ऑक्टोबर

इरोम शर्मिला यांची नव्या राजकीय पक्षाची घोषणा

  • सोळा वर्षे उपोषण केल्यानंतर राजकारणात येण्याची घोषणा करणाऱ्या आयर्न लेडी इरोम शर्मिला यांनी नव्या राजकीय पक्षाची घोषणा केली आहे.
  • पिपल्स रिसर्जंस अॅण्ड जस्टिस अलायन्स या नव्या पक्षाच्या माध्यमातून त्या जनतेची सेवा करणार आहेत.
  • याच महिन्यात इरोम शर्मिला यांना जिल्हा न्यायालयाने आत्महत्येचा प्रयत्न केल्याप्रकरणी एका खटल्यात निर्दोष ठरवले होते.
  • मणिपूरमधील सशस्त्र दल विशेषाधिकार कायदा (अफ्स्पा) हटवण्याच्या मागणीसाठी त्यांनी १६ वर्षे उपोषण केले होते.
  • त्यांना त्यात यश आले नाही. त्यानंतर त्यांनी उपोषण सोडले व राजकीय पक्ष स्थापण्याची भुमिका घेतली होती.
  • इरोम शर्मिला यांनी दिल्लीचे मुख्यमंत्री अरविंद केजरीवाल यांची भेट घेऊन त्यांच्याकडून काँग्रेसला कशा पद्धतीने पराभूत करायचे, याचे धडे घेतले.
  • काँग्रेस आणि भाजपला हरविण्यासाठी आम आदमी पक्षाने काय रणनिती आखली होती, हे त्यांनी जाणून घेतले.
  • इरोम शर्मिला यांनी उपोषण सोडल्यानंतर भाजपने त्यांना पक्षात येण्याचे निमंत्रण दिले होते.
  • तसेच २०१४साली आम आदमी पक्षाने इरोम शर्मिला यांना मणिपूर मतदारसंघातून लोकसभा निवडणूक लढविण्याची ऑफर दिली होती.

डॉ. सलील लचके यांना गेरार्ड जे मॅँगोन तरुण वैज्ञानिक पुरस्कार

  • मोतीबिंदूसह इतर नेत्ररोगांवर संशोधन करणारे डॉ. सलील लचके यांना फ्रान्सिस एलसन सोसायटीच्या गेरार्ड जे मॅँगोन तरुण वैज्ञानिक पुरस्काराने सन्मानित करण्यात आले आहे.
  • पुणे विद्यापीठातून बीएस्सी व एमएस्सी केल्यानंतर, सध्या ते डेलावर विद्यापीठात जैवविज्ञानाचे सहायक प्राध्यापक आहेत. तेथे त्यांनी जीवशास्त्रात पीएच.डी. केली.
  • सस्तन प्राण्यांच्या डोळ्याची रचना समजून घेऊन मोतीबिंदू लांबवणे हा लचके यांच्या संशोधनाचा एक विषय आहे.
  • लचके यांना सोल लॅबचे सदस्य असताना शोधनिबंधासाठी पुरस्कार मिळाला. त्यामुळे त्यांना संशोधनासाठी आणखी प्रेरणा मिळाली.
  • त्यांनी नंतर ३२ शोधनिबंध लिहिले असून २०१२मध्ये त्यांना प्यू चॅरिटेबल ट्रस्टचा पुरस्कार जैववैद्यकात मिळाला होता. 
  • सध्या ते नॅशनल इन्स्टिटय़ूट ऑफ हेल्थच्या १.९५ दशलक्ष डॉलरच्या प्रकल्पावर काम करीत असून डोळ्यांची भिंगे पेशीय व रेणवीय प्रक्रियांनी पारदर्शक कशी ठेवता येतील हा त्यांच्या संशोधनाचा विषय आहे.
  • डोळ्याच्या रोगास कारण ठरणाऱ्या जनुकांचे नियंत्रण करणे हा त्याच्या संशोधनाचा महत्त्वाचा भाग आहे.
  • त्यामुळे लचके यांचे संशोधन संपूर्ण जगातील लोकांना नेत्रआरोग्य मिळण्यासाठी वरदान ठरणार आहे.

बीसीसीआयची याचिका सर्वोच्च न्यायालयाने फेटाळली

  • लोढा समितीच्या शिफारशी लागू करण्यासाठी अडथळे आणत असलेल्या भारतीय क्रिकेट नियामक मंडळाची पुनर्विचार याचिका सर्वोच्च न्यायालयाने फेटाळली. 
  • सर्वोच्च न्यायालयाने बीसीसीआयला जस्टिस लोढा यांच्या शिफारसी पूर्णपणे लागू करण्याचे आदेश दिले होते.
  • आता पुनर्विचार याचिकाही फेटाळण्यात आल्याने बीसीसीआयला शिफारशी लागू करण्याशिवाय दुसरा पर्याय नाही.

टिफ्सा जागतिक स्पर्धेमध्ये भारताला चार पदके

  • भारताच्या मल्लांनी इंडोनेशियातील जकार्ता येथे झालेल्या टिफ्सा जागतिक क्रीडा स्पर्धेमध्ये एका सुवर्णपदकासह एकूण चार पदकांची कमाई केली.
  • भारताच्या दालमियाने पुरुषांच्या ६० किलो वजनी गटामध्ये अझरबैजानच्या महंमद सहानचाप पराभव करत सुवर्णपदक पटकावले. 
  • भारताचा लवसिंग ८० किलो गटात रौप्यपदक विजेता ठरला. अंतिम फेरीत अझरबैजानच्या महंमद आलिमने लववर ५-१ अशी मात केली.
  • याशिवाय नवीन कुमार आणि जोशील या भारतीय कुस्तीगिरांनी आपापल्या गटात ब्राँझपदक जिंकले.
  • नवीनने ९० किलो गटात ब्राँझपदकाच्या लढतीत लिथुआनियाच्या ओलेग याला पराभूत केले.
  • तर जोशीलने सुपर हेवीवेट (९७ ते १२५ किलो) गटात अफगाणिस्तानच्या मुस्तफा सुलतानीचा पराभव करून ब्राँझपदकावर नाव कोरले.

सायना नेहवालची आयओसी अॅथलिट्स कमिशनच्या सदस्यपदी निवड

  • भारताची बॅडमिंटनपटू सायना नेहवालची आंतरराष्ट्रीय ऑलिम्पिक समितीच्या (IOC) अॅथलिट्स कमिशनच्या सदस्यपदी निवड करण्यात आली आहे. 
  • या अॅथलिट्स कमिशनचे अध्यक्षपद अँजेला रुजारिओ भूषवत असून,  या कमिशनमध्ये नऊ उपाध्यक्ष आणि दहा सदस्य आहेत.

कोणत्याही टिप्पण्‍या नाहीत:

टिप्पणी पोस्ट करा