चालू घडामोडी : १० फेब्रुवारी

संजीव सन्याल अर्थ विभागाचे प्रधान आर्थिक सल्लागार

  • प्रसिद्ध अर्थतज्ज्ञ संजीव सन्याल यांची अर्थ व्यवहार विभागाचे प्रधान आर्थिक सल्लागार म्हणून नियुक्ती करण्यात आली आहे.
 संजीव सन्याल यांच्याबद्दल 
शिक्षण
  • कोलकात्यातील जन्म आणि शालेय शिक्षण असलेल्या सन्याल यांनी नवी दिल्लीतील श्री राम महाविद्यालयातून कला विषयात पदवी प्राप्त केली आहे.
  • त्यांनी दिल्ली विद्यापीठातील एक आणि ऑक्सफर्ड विद्यापीठातील दोन पदव्युत्तर पदवीप्राप्त केल्या आहेत.
कार्यानुभव
  • डॉईश या जागतिक स्तरावरील आघाडीच्या बँकेचे २००८पर्यंत व्यवस्थापकीय संचालक
  • आंतरराष्ट्रीय वित्तीय बाजारपेठेतील कार्याचा त्यांना दोन दशकांचा अनुभव.
  • भारतातील आविष्कार या सूक्ष्म भांडवल उभारणी कंपनीचे ते सल्लागार आहेत.
  • जॉन टेम्पलटन फाऊंडेशन या आशिया-पॅसिफिकमधील वित्तसंस्थेचेही ते सल्लागार राहिले आहेत.
  • भारतातील विविध राज्यांमध्ये साकारले जाणाऱ्या प्रकल्पांसाठी हरितविषयक अभ्यास गटाचे ते संचालक राहिले आहेत.
पुरस्कार व सन्मान
  • दावोसमध्ये जागतिक आर्थिक मंचाद्वारे २०१०मध्ये झालेल्या कार्यक्रमात जागतिक तरुण नेतृत्व म्हणून गौरव.
  • शहरी मुद्दय़ावरील त्यांनी केलेल्या अर्थविषयक कार्यासाठी २००७मध्ये ‘एसनहोवर’ शिष्यवृत्ती.
  • २०१४मध्ये झालेल्या जागतिक शहर परिषदेत त्यांना सिंगापूर सरकारकडून सन्मानित.
  • जुलै २०१४मध्ये आंतरराष्ट्रीय स्तरावर भिन्न क्षेत्रात एखाद्या भारतीयाने केलेल्या कार्याची दखल घेऊन दिला जाणारा ‘इंटरनॅशनल इंडियन अ‍ॅचिव्हर’ पुरस्कार.
साहित्यसंपदा
  • लॅण्ड ऑफ सेव्हन रिव्हर्स : अ ब्रीफ हिस्टरी ऑफ इंडियाज जिओग्राफी
  • द इंडियन रेनायसेन्स : इंडियाज राइज आफ्टर अ थाऊजंड इअर्स ऑफ डिक्लाइन
  • द इन्क्रेडिबल हिस्टरी ऑफ इंडियाज जिओग्राफी
  • द ओशन ऑफ चर्न

एलआयसीच्या व्यवस्थापकीय संचालकपदी हेमंत भार्गव

  • सार्वजनिक क्षेत्रातील कंपनी असलेल्या भारतीय आयुर्विमा महामंडळाच्या (एलआयसी) व्यवस्थापकीय संचालकपदी (एमडी) हेमंत भार्गव यांची नियुक्ती करण्यात आली.
  • भार्गव हे सध्या एलआयसीचे दिल्लीमध्ये विभागीय व्यवस्थापक आहेत. ही नियुक्ती त्यांच्या निवृत्तीपर्यंत म्हणजेच ३१ जुलै २००९पर्यंत असणार आहे.
  • एलआयसीच्या वरिष्ठ पातळीवरील व्यवस्थापनात अध्यक्ष आणि तीन व्यवस्थापकीय संचालकांचा समावेश आहे.

टाटा पॉवरच्या अध्यक्ष व अतिरिक्त संचालकपदी एन. चंद्रशेखरन

  • टाटा उद्योगसमूहाची घटक कंपनी असलेल्या टाटा पॉवरने एन. चंद्रशेखरन यांची नियुक्ती कंपनीचे अध्यक्ष व अतिरिक्त संचालक म्हणून केली आहे.
  • ही नियुक्ती ११ तारखेपासून अंमलात येणार आहे. एन. चंद्रशेखरन यांची नेमणूक टाटा सन्सचे भावी अध्यक्ष म्हणून यापूर्वीच झाली आहे.
  • सध्या ते टीसीएसचे मुख्य कार्यकारी अधिकारी व व्यवस्थापकीय संचालक म्हणून काम पहात आहेत.

स्वस्त दरांमध्ये धान्य खरेदीसाठी आधार कार्ड अनिवार्य

  • स्वयंपाकाच्या गॅसनंतर आता शिधावाटप केंद्रांवरुन स्वस्त दरांमध्ये धान्य खरेदी करण्यासाठी आधार कार्ड अनिवार्य असणार आहे.
  • भ्रष्टाचार रोखण्यासाठी आणि अनुदानाचा लाभ योग्य व्यक्तींपर्यंत पोहोचवण्यासाठी सरकारकडून हे पाऊल उचलण्यात आले आहे.
  • खाद्य आणि ग्राहक विभागाने ८ फेब्रुवारीला अधिसूचना जारी केली आहे. जम्मू काश्मीर, आसाम आणि मेघालयचा अपवाद वगळता ही अधिसूचना ८ फेब्रुवारीनंतर देशभरात लागू झाली आहे.
  • आधार नसलेल्या लोकांनी ३० जूनपर्यंत आधार कार्डसाठी अर्ज करण्याचे आवाहन सरकारकडून करण्यात आले आहे.
  • खाद्य सुरक्षा कायद्यांतर्गत सरकार देशातील ८० कोटी लोकांना दर महिन्याला प्रति व्यक्तीसाठी ५ किलो धान्य १ रुपया ते ३ रुपये दराने देते.
  • खाद्य सुरक्षा कायद्यांतर्गत अनुदानासाठी सरकार दरवर्षी १.४ लाख कोटी रुपये खर्च करते.

अमेरिकेतील प्रवेशबंदी फेडरल अपील्स कोर्टानेही घटनाबाह्य ठरवली

  • सात मुस्लीम बहुल देशातील नागरिकांवर राष्ट्राध्यक्ष डोनाल्ड ट्रम्प यांनी लादलेली अमेरिकाबंदी फेडरल अपील्स कोर्टाने (उच्च न्यायालय) घटनाबाह्य ठरवली आहे.
  • याआधी, डोनाल्ड ट्रम्प यांनी घातलेली बंदी जिल्हा न्यायालयाने घटनाबाह्य ठरवली होती.
  • या निर्णयाविरोधात ट्रम्प यांच्या प्रशासनाने उच्च न्यायालयामध्ये धाव घेतली होती. उच्च न्यायालयाने जिल्हा न्यायालयाचा निर्णय कायम ठेवला आहे.
  • उच्च न्यायालयाने अमेरिकेमध्ये प्रवास करण्यास या सात मुस्लीम देशातील नागरिकांना निर्बंध नसल्याचे स्पष्ट केले आहे.
  • अमेरिकेमध्ये प्रवास करण्यावर इराक, इराण, सिरिया, लिबिया, सोमालिया, सुदान आणि येमेन या सात देशातील नागरिकांना ९० दिवसांची बंदी घालण्यात आली होती.
  • तर, कुठल्याही देशातील निर्वासितांनी अमेरिकेमध्ये येण्यावर १२० दिवसांची बंदी घालण्यात आली होती.

पीएमएवाय योजनेंतर्गत घरखरेदीवर २.४० लाखांची सवलत

  • केंद्र सरकारने २१ डिसेंबर २०१६ रोजी जाहीर केलेल्या पंतप्रधान आवास योजनेंतर्गत (पीएमएवाय) दोन नवीन अनुदान योजनांची घोषणा केली होती.
  • सरकारच्या या योजनेमुळे नवीन घर घेणाऱ्यांना त्यांच्या उत्पन्नाच्या आधारे अनुदान मिळणार आहे.
  • यानुसार वार्षिक उत्पन्न १८ लाख असणाऱ्यांना आणि पहिल्यांदा घर घेणाऱ्यांना २.४० लाखांची सवलत मिळणार आहे.
  • याआधी ही सवलत फक्त ६ लाखांपर्यंत वार्षिक उत्पन्न असलेल्यांनाच मिळत होती. आता ती मर्यादा वाढवण्यात आली आहे.
  • याशिवाय १५ वर्षांच्या गृहकर्जाच्या कालावधीसाठी हो योजना लागू होती. आता २० वर्षांच्या गृहकर्जासाठी ही सवलत देण्यात येणार आहे.
  • या योजनेनुसार सरकार गृहकृजावरील व्याजावर अनुदान देणार आहेत. हे अनुदान प्राप्तिकरमध्ये मिळणाऱ्या सवलती व्यतिरिक्त असणार आहे.
  • हुडको आणि नॅशनल हाऊसिंग बँक (एनएचबी) यांच्यावर अनुदान देण्याची जबाबदारी सोपवण्यात आली आहे.
  • आतापर्यंत कमी उत्पन्न असलेल्या १८ हजार लोकांना एकूण ३१० कोटींचे अनुदान देण्यात आले आहे.

कोणत्याही टिप्पण्‍या नाहीत:

टिप्पणी पोस्ट करा