चालू घडामोडी : १२ मार्च

मनोहर पर्रीकर तिसऱ्यांदा गोव्याच्या मुख्यमंत्रीपदी

• मनोहर पर्रीकर यांनी संरक्षण मंत्रीपदाचा राजीनामा दिल्यानंतर त्यांच्या पदाचा अतिरिक्त कार्यभार अर्थमंत्री अरुण जेटली यांच्याकडे देण्यात आला आहे.
• पर्रीकर १४ मार्च रोजी तिसऱ्यांदा गोव्याच्या मुख्यमंत्रीपदाची शपथ घेणार आहेत. त्यासाठी त्यांनी सरंक्षण मंत्रीपदाचा राजीनामा दिला आहे. शपथ घेतल्यानंतर १५ दिवसांच्या आत सभागृहात त्यांना बहुमत सिद्ध करावे लागणार आहे.
• भाजप इतर पक्षाच्या व अपक्ष आमदारांशी हातमिळवणी करून सरकार स्थापनेसाठी प्रयत्नशील होते. त्यावर स्थानिक पक्षांनी मनोहर पर्रीकर यांच्या नेतृत्वाखाली सरकार स्थापन करण्यास तयारी दर्शवली.
• त्यामुळे पर्रीकर यांनी २१ आमदारांच्या पाठिंब्यासह सरकार स्थापनेचा दावा केल्यानंतर राज्यपाल मृदुला सिन्हा यांनी पर्रीकर यांना सरकार स्थापन करण्यासाठी निमंत्रित केले आहे.
• गोवा फॉरवर्ड पार्टी, महाराष्ट्रवादी गोमंतक पक्ष यांचे प्रत्येकी ३, तसेच २ अपक्ष यांच्या पाठिंब्यावर भाजपने सत्तेच्या स्पर्धेत काँग्रेसला बाजूला ठेवले आहे.
• २०१४च्या अखेरीस मोदींनी आपल्या मंत्रिमंडळाचा विस्तार करत मनोहर पर्रीकर यांची संरक्षणमंत्रीपदी नियुक्ती केली होती. त्यावेळी त्यांनी गोव्याच्या मुख्यमंत्रिपदाचा राजीनामा दिला होता.  
• पर्रीकर यांनी २००० ते २००५ आणि २०१२ ते २०१४ या काळात गोव्याचे मुख्यमंत्री म्हणून काम पाहिले होते.

राजस्थानामध्ये अभ्यासक्रमात गीता आणि वेद यांचा समावेश

• राजस्थान विद्यापीठाने कॉमर्स शाखेतील अभ्यासक्रमातील बँकींग आणि फायनान्स या दोन्ही विषयांऐवजी आता गीता आणि वेद यांचा समावेश केला आहे.
• त्याशिवाय भगवान कृष्ण, महावीर, महात्मा गांधी, गीताचे प्राथमिकता आणि योगा आदी विषयांचे ज्ञान दिले जाणार आहेत.
• उच्च शिक्षणाचे भारतीयकरण करणे तसेच भारतीय विद्यार्थ्यांना भारतीय महाकाव्य, धार्मिक व्यक्ति आणि भारतीय दर्शन शास्त्र माहित व्हावे हा या निर्णयामागचा हेतू आहे.
• विद्यार्थ्यांना ही माहिती देऊन जगाला मॅनेजमेंटची नवी ओळख करून देणे ही त्यामागची भूमिका आहे.
• तसेच अभ्यासक्रमातून पब्लिक अँड बिजनेस अॅडमिनिस्ट्रेशनलाही हटविण्यात आले आहे. त्याऐवजी स्वामी विवेकानंद, महात्मा गांधींचे दर्शन शास्त्र, रामायण व गीतेचा समावेश करण्यात आला आहे.

अमेरिकेतील भारतीय वंशाचे अॅटर्नी प्रीत भरारा बडतर्फ

• भ्रष्टाचाराविरोधातील खटल्यांमध्ये महत्त्वाची कामगिरी बजावणारे भारतीय वंशाचे अमेरिकेतील अॅटर्नी प्रीत भरारा यांना बडतर्फ करण्यात आले आहे.
• ओबामा यांच्या प्रशासनात नियुक्त झालेल्या सर्व ४६ अॅटर्नींनी राजीनामे द्यावे असे आदेश ट्रम्प प्रशासनाने दिली होते. मात्र, भरारा यांनी राजीनामा देण्यास नकार दिला होता.
• प्रशासनात एकसूत्रता यावी म्हणून ओबामा यांच्या काळात नियुक्त करण्यात आलेल्या अॅटर्नींना काढून टाकावे अशी सूचना महाधिवक्ता जेफ सेशन्स यांनी केली होती.
• २०१३मध्ये देवयानी खोब्रागडे प्रकरणामध्ये निर्माण झालेल्या वादात प्रीत भरारा चर्चेमध्ये आले होते.

पाकिस्तान दिनाच्या संचलनामध्ये चीन व तुर्कस्तानचा सहभाग

• पाकिस्तानची राजधानी असलेल्या इस्लामाबाद शहरामध्ये पुढील आठवड्यामध्ये होणाऱ्या ‘पाकिस्तान दिना’साठीच्या संचलनामध्ये प्रथमच चीन व तुर्कस्तान या देशांचे सैन्यदलही सहभागी होणार आहे.
• २३ मार्च १९४० रोजी लाहोर येथील अधिवेशनामध्ये स्वतंत्र पाकिस्तानचा स्पष्ट ठराव मांडण्यात आला होता. हा दिवस पाकिस्तान दिन म्हणून साजरा करण्यात येतो.
• या दिवशी पाकिस्तानच्या सैन्यदलातर्फे संचलन करण्यात येते. मात्र गेली काही वर्षे सैन्याच्या उठावाच्या भीतीमुळे हे संचलन रद्द करण्यात आले होते. परंतु २०१५पासून पुन्हा एकदा हा दिवस साजरा करण्यात येऊ लागला आहे.

---