चालू घडामोडी : ११ ऑक्टोबर
एफटीआयआयच्या अध्यक्षपदी अनुपम खेर
- ज्येष्ठ अभिनेते अनुपम खेर यांची पुण्यातील ‘फिल्म अँड टेलिव्हिजन इन्स्टिट्यूट ऑफ इंडिया’च्या (एफटीआयआय) अध्यक्षपदी केंद्र सरकारने नियुक्ती केली आहे.
- विद्यमान चेअरमन गजेंद्र चौहान यांच्या अध्यक्षपदाचा कालावधी या वर्षी मार्चमध्ये संपला होता. त्यांची जागा आता अनुपम खेर घेतील.
- चौहान यांचा अध्यक्षपदाविरोधात विद्यार्थ्यांनी, तेथील शिक्षकांनी आणि चित्रपट क्षेत्रातील अनेकांनी त्यांच्या नियुक्तीला मोठा विरोध केला होता व १३९ दिवसांचा संप पुकारला होता.
- अनुपम खेर हे दिल्लीच्या नॅशनल स्कूल ऑफ ड्रामा येथून पदवीधर झाले आहेत. सन १९८२मध्ये त्यांनी अभिनयाला सुरुवात केली.
- त्यांनी चरित्र अभिनेते म्हणून बॉलिवूडमध्ये दीर्घकाळ आपली छाप पाडली आहे. त्यांनी ५००हून अधिक चित्रपट व अनेक नाटकांमध्ये काम केले आहे.
- त्यांचे कर्मा, चायना गेट, दिलवाले दुल्हनिया ले जाएँगे, कुछ कुछ होता है असे चित्रपट विशेष गाजले होते.
- यापूर्वी खेर यांनी दिल्लीच्या ‘नॅशनल स्कूल ऑफ ड्रामा’चे संचालक म्हणून आणि ‘सेंट्रल बोर्ड ऑफ फिल्म सर्टिफिकेशन’ (सेंसॉर बोर्ड)चे अध्यक्ष म्हणून काम केले आहे.
- चित्रपटसृष्टीतील योगदानासाठी भारत सरकारने खेर यांना पद्मश्री (२००४) आणि पद्मभूषण (२०१६) या पुरस्कारांनी गौरवले आहे.
डोकलाम वादाच्या अभ्यासासाठी संसदीय समिती
- चीनबरोबरचा ७३ दिवसांचा डोकलाम वाद व रोहिंग्या शरणार्थीचा प्रश्न या दोन्ही मुद्दय़ांचा अभ्यास परराष्ट्र खात्याअंतर्गत नेमण्यात आलेली संसदीय समिती करणार आहे.
- या समितीत काँग्रेसचे उपाध्यक्ष राहुल गांधी यांचा समावेश असून, या समितीचे नेतृत्व काँग्रेसचे खासदार शशी थरूर करीत आहेत.
- या समितीची बैठक पुढील महिन्यात होण्याची शक्यता आहे. यात परराष्ट्र धोरणातील अनेक मुद्दय़ांवर चर्चा केली जाणार आहे.
- चीन व भारत यांच्यातील सीमा प्रश्न व डोकलाम मुद्दयावरून असलेले वाद, तसेच म्यानमारशी संबंध व रोहिंग्या शरणार्थीचा भारतातील प्रवेशाचा मुद्दा यावर यात विचार केला जाणार आहे.
- याबरोबरच अनिवासी भारतीयांना मतदानाचा हक्क, युरोपीय समुदायातील ब्रेक्झिटमुळे असलेला पेच तसेच त्याचे भारतावर परिणाम, पासपोर्ट प्रणाली यावरही त्यात चर्चा होण्याची शक्यता आहे.
- भारत व चीन यांच्यात ऑगस्टमध्ये एक समझोता झाला असून त्यानुसार दोन्ही देशांनी सैन्य डोकलाममधून माघारी घेतले आहे.
- चीनमधील ब्रिक्स परिषदेला पंतप्रधान मोदी जाणार होते त्या आधी चीनने सैन्य माघारी घेतले व तो भारताचा मोठा राजनैतिक विजय मानला जातो.
- तरी नंतर पुन्हा चीनने कुरापती काढण्यास सुरूवात केली असून रस्ते बांधणीचे काम पुन्हा सुरू केल्याच्या बातम्या आहेत.
सोनीपतमधील बॉम्बस्फोटाप्रकरणी टुंडाला जन्मठेप
- हरयाणातील सोनीपतमधील बॉम्बस्फोटाप्रकरणी न्यायालयाने दहशतवादी अब्दुल करीम टुंडाला जन्मठेपेची शिक्षा सुनावली आहे. याशिवाय न्यायालयाने टुंडाला दीड लाख रुपयांचा दंडही ठोठावला आहे.
- सोनीपतमध्ये २८ सप्टेंबर १९९६ रोजी झालेल्या दोन बॉम्बस्फोटांमध्ये १२ जण जखमी झाले होते. या बॉम्बस्फोटामागे अब्दुल करीम टुंडाचा हात असल्याचे समोर आले होते.
- टुंडा हा ‘लष्कर- ए- तोयबा’ या संघटनेचा दहशतवादी असून १९९४ ते १९९८ या कालावधीत दिल्लीसह भारतातील विविध शहरांमधील दहशतवादी हल्ल्यांमध्ये टुंडा सहभागी झाला होता.
- टुंडाचा एकूण ३३ दहशतवादी हल्ल्यांमध्ये सहभाग होता. त्याच्याविरोधात दिल्लीत २२ तर पंजाब, हरयाणा, उत्तर प्रदेश आणि राजस्थानमध्ये ११ खटले प्रलंबित आहेत.
- दिल्लीत १९९७ साली झालेल्या दोन वेगवेगळ्या बाँबस्फोटांप्रकरणी अब्दुल करीम टुंडाला दोन वर्षांपूर्वी दोषमुक्त करण्यात आले होते.
- स्फोटके तयार करण्यात पटाईत असलेल्या टुंडाने १९८५मध्ये आयएसआयमध्ये प्रशिक्षण घेतले होते. त्याला ऑगस्ट २०१३मध्ये दिल्ली पोलिसांनी भारत-नेपाळ सीमेवरुन अटक केली होती.
- अब्दुल करीम टुंडा हा कुख्यात डॉन दाऊद इब्राहीम याचा निकटचा साथीदार म्हणून ओळखला जातो.
तेलगु नाटककार हरनाथा राव यांचे निधन
- साहित्य अकादमी पुरस्काराने सन्मानित तेलुगुतील सामर्थ्यशाली लेखक, नाटककार, चित्रपट कथालेखक व अभिनेते एम. व्ही. एस. हरनाथा राव यांचे ९ ऑक्टोबर २०१७ रोजी निधन झाले.
- आंध्र प्रदेशातील गुंटूर येथे २७ जुलै, १९४८ रोजी त्यांचा जन्म झाला. त्यांचे वडील कारकून होते, तर आई सत्यवती देवी यांनी कर्नाटक संगीतात पदविका घेतलेली होती.
- लहानपणापासूनच त्यांना साहित्याची आवड होती. तिसऱ्या इयत्तेत असताना त्यांनी एका नाटकात काम केले आणि तरुणपणी नाट्यलेखनास सुरुवात केली.
- चित्रपट निर्माते टी. कृष्णा यांच्या माध्यमातून ते चित्रपट क्षेत्रात आले व सुरुवातीला पटकथा व संवादलेखक म्हणून काम केले. ‘रक्षासुडू’ व ‘स्वयमकृषी’ चित्रपटांत त्यांनी अभिनयही केला.
- त्यांनी ‘प्रतिघटना’, ‘भारत नारी’, ‘अमायी कापूरम’ अशा जवळपास दीडशे चित्रपटांसाठी संवादलेखन करून तेलुगु चित्रपटसृष्टीवर छाप स्वतःची पाडली. एकूणच त्यांचे लेखन हे आधुनिकतेकडे झुकणारे होते.
- ‘रक्ताबाली’ हे त्यांचे पहिले नाटक चांगलेच गाजले. त्यांच्या ‘कन्यावर सुल्कम’ या नाटकास आंध्र प्रदेशच्या सांस्कृतिक खात्याचा पुरस्कार मिळाला.
- ‘क्षीरसागर मंथनम’ या नाटकासाठी त्यांना साहित्य अकादमी पुरस्काराने सन्मानित करण्यात आले होते.
- आंध्रातील प्रतिष्ठेचा नंदी पुरस्कार त्यांना चार वेळा मिळाला होता. आंध्र नाट्य परिषदेच्या स्पर्धेत १९८०मध्ये त्यांच्या ४ नाटकांना २० पुरस्कार मिळाले होते.
- ‘अंचम कडीडी आरंभम’, ‘यक्षगानम’, ‘रेडलाइट एरिया’, ‘मी परिमिती’, ‘प्रजाकवी वेमना’, ‘जगन्नाथ रथ चक्रालू’ ही त्यांची इतर नाटके.
- त्यांच्या ‘लेडी चंपिना पुली नेटुरू’ व ‘अरण्य रोदनम’ या दोन नाटकांचे चित्रपटात रूपांतर करण्यात आले.
- राव हे डाव्या विचारसरणीकडे झुकणारे लेखक होते. त्यांनी समकालीन स्त्रियांची पात्रे व्यवस्थेविरोधात बंडखोरी करताना दाखवली.
- ते एक चांगले नाटककार होते. त्यामुळे त्यांच्या निधनाने या क्षेत्रातील पुरोगामी चळवळीला धक्का बसला आहे.
तृतीयपंथी व्यक्तीची न्यायाधीशपदी निवड
- ट्रान्सजेंडरर्सच्या (तृतीयपंथी) हक्कांसाठी लढणाऱ्या दिल्लीच्या जोइता मंडल या तृतीयपंथीची पश्चिम बंगालमधील इस्लामपूरच्या राष्ट्रीय लोक अदालतीच्या न्यायाधीशपदी निवड करण्यात आली आहे.
- यामुळे शतकानुशतके उपेक्षित राहिलेल्या या समाजघटकाला राष्ट्रीय प्रवाहात आणण्याच्या प्रयत्नांमध्ये या एका नव्या प्रयत्नाची भर पडली आहे.
- जुलै महिन्यात लोक अदालतीसाठी इस्लामपूरच्या सब डिव्हिजनल लीगल सर्व्हिस कमिटीतर्फे जोईता मंडल यांची नियुक्ती करण्यात आली होती.
- याच लोक अदालतीसमोर २०१०साली जोईता यांना त्या ट्रान्सजेंडर असल्याच्या कारणावरून एका हॉटेलमध्ये रुम देण्यास नकार देण्यात आला होता व त्यांना रात्र फूटपाथवर काढावी लागली होती.
- या प्रसंगाने त्यांच्या आयुष्याला एक कलाटणी दिली. या वागणुकीने अस्वस्थ झालेल्या जोईता यांनी मग पुढे तृतीयपंथियांच्या अधिकारांसाठी लढा सुरू केला
- त्यांच्या या कार्याची दखल घेतली गेली आणि त्यांना न्यायाधीशपदी नियुक्त करण्यात आले.
- ट्रान्स वेल्फेअर इक्विटीच्या संस्थापक अभीना यांच्यामते, या समाजघटकातील एका व्यक्तीला असा मान मिळण्याचा हा इतिहासातील पहिलाच प्रसंग आहे.
कोणत्याही टिप्पण्‍या नाहीत:
टिप्पणी पोस्ट करा