चालू घडामोडी : १६ मे

संपूर्ण स्वदेशी बनावटीचे अवकाशयान तयार

  • भारतीय अवकाश संशोधन संस्थेने (इस्रो) प्रथमच संपूर्ण स्वदेशी बनावटीचे अवकाशयान तयार केले आहे. या अवकाशयानासाठी कोणत्याही प्रकारे विदेशी मदत घेतली गेली नाही.
  • हे भारतीय स्पेस शटल तयार करण्याचे काम पाच वर्षांपूर्वी सुरू झाले असून त्यासाठी ९५ कोटी रुपये खर्च आला आहे. 
  • एखाद्या ‘एसयूव्ही’ मोटारइतका आकार आणि वजन असलेल्या या ‘रियूझेबल लॉंच व्हेइकल- टेक्नॉलॉजी डेमोन्स्ट्रेटर’ (आरएलव्ही-टीडी) अवकाशयानाची अंतिम चाचणी घेण्यात आली आहे.
  • सध्या हे यान श्रीहरीकोटा येथील अवकाश केंद्रात ठेवले असून, हे अवकाशयान लवकरच प्रक्षेपित केले जाणार आहे. या प्रयोगाचे नाव हायपरसॉनिक एक्सपिरिमेंट असे आहे. 
  • पुनर्वापर करता येण्यासारखे पंख हे या अवकाशयानाचे वैशिष्ट्य आहे. हा प्रकल्प यशस्वी झाल्यास अवकाशयानाच्या निर्मितीचा खर्च दहा पटीने कमी म्हणजे दोन हजार डॉलर प्रति किलो एवढा होणार आहे.
  • प्रक्षेपण झाल्यानंतर अवकाशयानाला लावलेले काही पंख (डेल्टा विंग्ज) बंगालच्या उपसागरात उतरविता येणार आहेत. या पंखांच्या रचनेमुळे ते तरंगणार नसल्याने परत आणता येणे अवघड आहे. मात्र, या प्रयोगाचा उद्देश पंखांचे तरंगणे नसून ते अवकाशयानापासून परत येणे, हा आहे.

रोम मास्टर्स टेनिस स्पर्धा


 सानिया-हिंगीस अजिंक्य 
  • भारताच्या सानिया मिर्झाने स्वित्झर्लंडच्या मार्टिना हिंगीसच्या साथीने रोम मास्टर्स टेनिस स्पर्धेच्या महिला दुहेरीचे विजेतेपद पटकावले. सानियाचे हे ३७वे दुहेरी विजेतेपद आहे तर हिंगीसचे हे ५५वे अजिंक्यपद आहे.
  • सानिया आणि हिंगीस या अव्वल मानांकित जोडीने मकरोव्हा आणि वेसनिना या सातव्या मानांकित रशियन जोडीवर ६-१, ६-७, १०-३ असा विजय मिळवला.
  • या जोडीचे क्ले कोर्टवरील हे पहिले विजेतेपद ठरले. गतवर्षी सानिया-हिंगीस यांना या स्पर्धेत उपविजेतेपदावर समाधान मानावे लागले होते.
  • या जोडीचे यंदाच्या हंगामातील हे पाचवे जेतेपद आहे. या जोडीने सिडनी, ब्रिस्बेन, ऑस्ट्रेलियन खुल्या स्पर्धेसह सेंट पीटर्सबर्ग स्पर्धेच्या जेतेपदावर कब्जा केला होता.
 सेरेना विल्यम्स विजयी 
  • अमेरिकेच्या सेरेना विल्यम्स हिने रोम मास्टर्स टेनिस स्पर्धेतील महिला एकेरीचे विजेतेपद पटकावले. कारकीर्दीतील सेरेनाचे हे एकेरीतील एकूण ७०वे जेतेपद ठरले.
  • महिला एकेरीच्या अंतिम लढतीत माजी विजेत्या सेरेनाने अमेरिकेच्याच मॅडिसन किजला ७-६ (५), ६-३ असे सरळ सेटमध्ये पराभूत केले. जवळजवळ दीड तास ही लढत चालली.
  • सेरेनाने चौथ्यांदा ही स्पर्धा जिंकली. यापूर्वी २००२, २०१३, २०१४मध्ये सेरेनाने ही स्पर्धा जिंकली होती. मोसमातील सेरेनाचे हे पहिलेच जेतेपद ठरले.
 जोकोव्हिच मरेकडून पराभूत 
  • जागतिक क्रमवारीत अव्वल स्थानी असलेल्या नोव्हाक जोकोव्हिचला पराभवाचा धक्का देत अँडी मरेने रोम मास्टर्स टेनिस स्पर्धेचे जेतेपद पटकावले.
  • मरेने अंतिम लढतीत जोकोव्हिचवर ६-३, ६-३ अशी मात केली. काही दिवसांपूर्वीच झालेल्या माद्रिद खुल्या टेनिस स्पर्धेच्या अंतिम लढतीत जोकोव्हिचने मरेवर मात केली होती.
  • १९३१ नंतर इंग्लंडच्या एकाही टेनिसपटूला रोम स्पर्धेचे जेतेपद पटकावता आलेले नव्हते. मरेने ही उणीवही भरून काढली. 

चार भारतीय शांतिरक्षकांना संयुक्त राष्ट्र पदक

  • संयुक्त राष्ट्राच्या शांतिरक्षण अभियानात काम करताना मृत्युमुखी पडलेले चार भारतीय शांतिरक्षक व एका नागरिकासह अन्य १२४ जणांना त्यांच्या साहस आणि बलिदानासाठी मरणोत्तर संयुक्त राष्ट्र पदकाने सन्मानित करण्यात येणार आहे.
  • आंतरराष्ट्रीय संयुक्त राष्ट्र शांतिरक्षक दिवसाच्या निमित्ताने या नागरिकांना डॅग हॅमरस्कजोल्ड मेडल देऊन सन्मानित करण्यात येणार आहे.
  • भारतीय शांतिरक्षकात हेड कॉन्स्टेबल शुभकरण यादव, रायफलमॅन मनीष मलिक, अमल डेका, नायक राकेश कुमार यांचा सहभाग आहे. यांच्यासोबत गगन पंजाबी हेही मारले गेले होते.
  • संयुक्त राष्ट्र शांतिरक्षक दिवस दरवर्षी २९ मे रोजी साजरा केला जातो; मात्र यावर्षी तो १९ मे रोजी साजरा होईल. संयुक्त राष्ट्राचे महासचिव बान की मून सर्व शहीद शांतिरक्षकांना पुष्पचक्र अर्पण करून या कार्यक्रमाची सुरुवात करतील.

कोणत्याही टिप्पण्‍या नाहीत:

टिप्पणी पोस्ट करा