मनिला येथे सुरु असलेल्या आसियान शिखर परिषदेच्या पार्श्वभूमीवर भारत, अमेरिका, जपान आणि ऑस्ट्रेलिया या चार देशांची बैठक झाली.
यातून सामाईक हितसंबंध जपण्यासाठी सुरक्षा सहकार्य वाढविण्याचे संकेत देण्यात आले आहेत.
‘आसियान’ संघटनेला ५० वर्षे पूर्ण झाल्यानिमित्त आसियान शिखर परिषदेला अनेक देशांचे प्रमुख मनिलामध्ये आले आहेत.
पंतप्रधान नरेंद्र मोदी यांच्यासह अमेरिकेचे अध्यक्ष डोनाल्ड ट्रम्प, जपानचे पंतप्रधान शिंझो आबे आणि ऑस्ट्रेलियाचे पंतप्रधान माल्कम टर्नबुलही येथे उपस्थित आहेत.
दक्षिण चीन समुद्रामध्ये चीनच्या वाढत्या अरेरावीच्या पार्श्वभूमीवर या चार देशांची आघाडी स्थापन करण्याचा विचार झाला.
हिंदी आणि प्रशांत महासागरातील शांतता, स्थैर्य आणि समृद्धीचा विचार करून सहकार्य करण्यावर या बैठकीमध्ये प्रामुख्याने चर्चा करण्यात आली.
सर्व देशांचे दीर्घकालीन हितसंबंध जपण्यासाठी हा परिसर मुक्त आणि खुला असण्यावर सर्व देशांचे एकमत झाले.
तसेच दहशतवाद, शस्त्रास्त्रांची तस्करी यामुळे या भागाला धोका आहे, याचाही विचार करण्यात आला.
प्रशांत आणि हिंदी महासागरामध्ये चीनच्या लष्करी हालचाली वाढत आहेत. चीनची वाढती महत्त्वाकांक्षा त्यातून दिसत आहे.
या बैठकीमुळे चीन चिंतेत असून, आपला आंतरराष्ट्रीय प्रभाव कमी करण्यासाठी हे चार देश एकत्र येत असल्याची चीनची भावना आहे.
राजकीय दृष्टीकोनातून पाहिल्यास चार देशांनी एकत्र येणे हा चीनसाठी एकप्रकारचा धोकाच आहे. भारत, अमेरिका, जपान आणि ऑस्ट्रेलिया हे लोकशाही प्रधान देश आहे तर चीनमध्ये कम्युनिस्ट पक्षाची सत्ता आहे.
या चार देशांबरोबरच्या व्यावसायिक, व्यापारी संबंधांमध्ये चीनचा जास्त फायदा आहे. हे चारही देश एकत्रितपणे व्यापार संतुलन साधण्यासाठी चीनवर दबाव आणू शकतात.
तसेच हे चारही देश चीनच्या वन बेल्ट वन रोड धोरणासमोर आव्हान निर्माण करु शकतात. वन बेल्ट, वन रोड ही शी जिनपिंग यांचे महत्वकांक्षी योजना आहे.
पेस-राजा जोडीला नोक्साविले स्पर्धेचे जेतेपद
भारताचा टेनिसपटू लिएंडर पेस याने पूरव राजाच्या सोबतीने जेम्स कारेतानी-जॉन पॅट्रिक यांचा पराभव करताना नोक्साविले चॅलेंजर ट्रॉफी स्पर्धेचे विजेतेपद जिंकले आहे.
अंतिम सामन्यात पेस-राजा यांनी ७-६, ७-६ अशी बाजी मारत कारेतानी-पॅट्रिक जोडीवर मत केली. पेस-राजा या जोडीचे हे पहिलेच जेतेपद ठरले.
यंदाच्या मोसमात पेसने चौथे चॅलेंजर विजेतेपद पटकावले असून, त्याने लिओन व इकले येथे कॅनडाच्या आदिल शम्सुद्दिनसह, तर टालाहासी येथे अमेरिकेच्या स्कॉट लिपस्कीसह बाजी मारली होती.
राजानेही दिविज शरणसह खेळताना बोर्डो चॅलेंजर जिंकले होते. तसेच चेन्नई ओपन स्पर्धेतही त्याने शरणसह अंतिम फेरी गाठली होती.
पंकज आडवाणीला १७वे विश्वविजेतेपद
भारताचा दिग्गज क्युइस्ट पंकज आडवाणी याने आयएसएसएफ विश्व बिलियर्डस् चॅम्पियनशिपमध्ये इंग्लंडच्या माईक रसेल याला पराभूत करत कारकिर्दीतील १७ वे विश्वविजेतेपद पटकावले.
आडवाणीने रसेलला ६-२ असे पराभूत केले. त्याने गेल्यावर्षी बंगळुरूतदेखील विजेतेपद पटाकावले होते.
मोदी यांची आंतरराष्ट्रीय भात संशोधन केंद्राला भेट
पंतप्रधान नरेंद्र मोदी यांनी फिलिपिन्स दौऱ्याच्या निमित्ताने लॉस बॅनॉस येथील आंतरराष्ट्रीय भात संशोधन केंद्रास (आयआरआरआय) भेट दिली.
यावेळी भाताच्या दोन नवीन प्रजातींचे बियाणे संस्थेच्या जनुक पेढीस दिले. भाताच्या या दोन्ही प्रजाती भारतीय आहेत.
मोदी यांच्या नावाने त्या संस्थेत भात संशोधन प्रयोगशाळा सुरू करण्यात आली आहे. ‘श्री. नरेंद्र मोदी रिसालियंट राइस फील्ड लॅबोरेटरी’ या नामफलकाचे अनावरण त्यांनी केले.
भारत सरकारने वाराणसीत आयआरआरआय या संस्थेचे केंद्र सुरू करण्याची घोषणा केली आहे.
या संस्थेची १७ देशांत कार्यालये असून १९६०च्या हरित क्रांतीनंतर भाताच्या नवीन प्रजाती विकसित करण्यात या संस्थेने मोठी भूमिका पार पाडली आहे.
झिम्बाब्वेमध्ये राजकीय संकट
झिम्बाब्वेचे राष्ट्रपती रॉबर्ट मुगाबे यांना तेथील लष्कराने ताब्यात घेत देशाची सर्व सूत्रे आपल्या हाती घेतल्यामुळे तेथे राजकीय संकट निर्माण झाले आहे.
गुन्हेगारांना शिक्षा देण्यासाठी रक्त न सांडता हे सत्ता परिवर्तन करण्यात आले आहे, असे लष्कराचे म्हणणे आहे.
गेल्या आठवड्यात मुगाबे यांनी उपराष्ट्रपती इमर्सन मनागाग्वा यांना पदच्युत केले होते. इमर्सन हे मुगाबे यांचे राजकीय वारस मानले जात होते.
मात्र नंतर राष्ट्राध्यक्ष मुगाबे यांची पत्नी ग्रेस मुगाबेचे नाव या अध्यक्षपदासाठी प्रमुख दावेदार म्हणून पुढे येऊ लागले.
त्यामुळे ग्रेस मुगाबे आणि इमर्सन यांचे दोन गट सत्ताधारी झानू पीएफ पक्षात तयार झाले आणि तणावाला सुरुवात झाली होती.
रॉबर्ट मुगाबे १९८० ते १९८७ या सात वर्षांसाठी ते झिम्बाब्वेचे पंतप्रधान होते आणि १९८७पासून ते आतापर्यंत सलग तीस वर्षे ते राष्ट्राध्यक्षपदावर आहे.
त्याचप्रमाणे अफ्रिकन युनियनच्या अध्यक्षपदाची जबाबदारीही रॉबर्ट मुगाबे यांनी सांभाळलेली आहे.
कोणत्याही टिप्पण्‍या नाहीत:
टिप्पणी पोस्ट करा