चालू घडामोडी : १४ व १५ ऑक्टोबर

यूएसआयबीसीच्या अध्यक्षपदी निशा बिस्वाल

  • भारतीय वंशाच्या निशा बिस्वाल यांची नुकतीच अमेरिका-भारत व्यापार परिषदेच्या (यूएसआयबीसी) अध्यक्षपदी निवड करण्यात आली आहे.
  • अमेरिकी चेंबर ऑफ कॉमर्सच्या अंतर्गत व्यावसायिकांचा ‘यूएसआयबीसी’ हा सर्वात प्रभावशाली गट समजला जातो. निशा बिस्वाल १ नोव्हेंबरपासून नव्या पदावर रुजू होतील.
  • गुजरातचा जन्म असलेल्या निशा बिस्वाल यांचा अमेरिकेच्या व्यापारविषयक धोरणांचा सखोल अभ्यास आहे. 
  • त्या शिक्षणासाठी भारतातून व्हर्जिनिया विद्यापीठात गेल्या होत्या आणि पुढे अमेरिकी राजनैतिक सेवेत असलेले, मूळचे ओरिसाचे सुब्रत बिस्वाल यांच्याशी विवाहबद्ध झाल्या.
  • २०१३-१७ या कालावधीत अमेरिकेच्या परराष्ट्र विभागातील दक्षिण व मध्य आशियासाठीच्या साहाय्यक मंत्रीपदावर असताना त्यांनी अमेरिका व भारत यांच्यातील द्विपक्षीय भागीदारीत अतुलनीय योगदान दिले आहे.
  • तसेच, या दोन्ही देशांमध्ये व्यापारी संबंधांना चालना देण्यासाठी बिस्वाल यांनीच चर्चा घडवून आणली होती.
  • या कामगिरीसाठी बिस्वाल यांना प्रतिष्ठेचा ‘प्रवासी भारतीय सम्मान’ देऊन तत्कालीन राष्ट्रपती प्रणब मुखर्जी यांनी गौरविले होते.
  • बिस्वाल यांनी याआधी अमेरिकेच्या आंतरराष्ट्रीय विकास संस्थेत साहाय्यक प्रशासक म्हणून मोलाची भूमिका बजावली होती.
  • राज्य कर्मचारी संचालक, विदेशी संचालन अनुमोदन उपसमिती आणि परराष्ट्र व्यवहार समिती या विभागांमध्येही बिस्वाल कार्यरत होत्या.

  • मोहन धारियांच्या स्मृतिप्रीत्यर्थ नागपूरच्या वनराई फौंडेशन तर्फे दिला जाणारा राष्ट्रनिर्माण पुरस्कार डॉ. मनमोहनसिंग यांना प्रदान करण्यात आला.

२० विद्यापीठांना १० हजार कोटींचा निधी

  • पुढील पाच वर्षात देशातील २० विद्यापीठांना १० हजार कोटी रुपयांचा निधी देण्यात येणार असल्याची घोषणा पंतप्रधान नरेंद्र मोदी यांनी केली आहे.
  • पाटणा विद्यापीठाला १०० वर्ष पूर्ण झाल्यानिमित्त, पाटण्यात आयोजित केलेल्या विशेष कार्यक्रमामध्ये नरेंद्र मोदी यांनी ही घोषणा केली.
  • २० पैकी १० विद्यापीठे सरकारी तर १० विद्यापीठे खासगी असतील. कामगिरीच्या आधारे विद्यापीठांना हा निधी दिला जाईल.
  • या निधीद्वारे पुढील पाच वर्षात या २० विद्यापीठांना जागतिक दर्जा मिळवून देण्याचा प्रयत्न करण्यात येणार आहे.

  • प्रणव मुखर्जी यांचे आत्मचरित्र : द कोएलिशन इयर्स १९९६-२०१२

बांगलादेशातील हिंदू न्यायाधीश सक्तीच्या रजेवर

  • बांगलादेशातील सर्वोच्च न्यायालयातील पहिले हिंदू सरन्यायाधीश सुरेंद्रकुमार सिन्हा यांना तेथील सरकारने सक्तीच्या रजेवर जाण्यास भाग पाडले आहे.
  • सर्वोच्च न्यायालयातील न्यायाधीशांवरील महाभियोगप्रकरणी सिन्हा यांनी संसदीय प्राधिकरणच बरखास्त करण्याचा निर्णय घेतला होता, त्यांच्या या निर्णयामुळे तेथील सरकार नाराज झाले आहे.
  • जुलै २०१७मध्ये सर्वोच्च न्यायालयाने १६वी घटनादुरुस्ती बेकायदा ठरवत, न्यायाधीशांवरील महाभियोगप्रकरणी संसदीय प्राधिकरण बरखास्त केले होते. 
  • सिन्हा यांच्या घटनापीठानेच हा निर्णय दिला होता. यावर बांगलादेशातील बड्या राजकीय नेत्यांनी जोरदार टीका केली होती.
  • यावेळी सिन्हा यांनी पाकिस्तानचे पदच्युत पंतप्रधान नवाझ शरीफ यांचे उदाहरण दिल्याने हा वाद आणखी चिघळला होता.