चालू घडामोडी : १३ ऑगस्ट

जीएसटी विधेयक आसाम विधानसभेत मंजूर

  • आसाम विधानसभेने वस्तू आणि सेवाकर (जीएसटी) घटनादुरुस्ती विधेयक सर्वसंमतीने मंजूर केले.
  • केंद्र शासनानंतर संपूर्ण देशात समान कर पद्धत राबविण्याचा प्रस्ताव असलेले जीएसटी विधेयक मंजूर करणारे आसाम पहिले राज्य ठरले आहे.
  • संसदेच्या दोन्ही सभागृहांनी मंजूर केलेले जीएसटी विधेयक आसाम विधानसभेत सर्वसंमतीने मंजूर केले गेले. विरोधी पक्ष कॉंग्रेस आणि एआययूडीएफच्या सदस्यांनी विधेयकाला पाठिंबा दिला.
  • संसदेच्या मान्यतेनंतर जीएसटीच्या अंमलबजावणीसाठी २९ पैकी अर्ध्या राज्यांची मंजुरी मिळणे आवश्यक आहे.
  • आसामचे मुख्यमंत्री : सर्वानंद सोनोवाल
 जीएसटी म्हणजे काय? 
  • जीएसटी अर्थातच वस्तू आणि सेवा कर हा संपूर्ण देशभरात लागू केला जाणार असून, व्हॅटसह इतर सर्व कर रद्द होणार आहे.
  • राज्य आणि केंद्र सरकारच्या वेगवेगळ्या करप्रणालींना पर्याय म्हणून जीएसटीकडे पाहिले जात आहे.
  • जीएसटी ही भारतातील सर्वात मोठी आर्थिक सुधारणा आहे. या करप्रणालीमुळे करचुकव्यांना चाप बसणार असून राज्य सरकार तसेच सर्वसामान्यांना यामुळे कोणताही त्रास होणार नाही.
  • या करप्रणालीमुळे सेंट्रल सेल्स टॅक्स, सेवा कर, एक्साइज टॅक्स, लक्झरी टॅक्स, मनोरंजन कर, व्हॅटसारखे सर्व कर रद्द होणार आहेत. ही करप्रणाली लागू झाल्यानंतर केंद्र आणि राज्यसरकारला यातील समान वाटा मिळणार आहे.

संसदेचे पावसाळी अधिवेशन समाप्त

  • संसदेचे पावसाळी अधिवेशन १२ ऑगस्ट रोजी समाप्त झाले त्याचबरोबर संसदेचे कामकाज अनिश्चित काळासाठी संस्थगित झाले.
  • भारताच्या करसुधारणांमधे स्वातंत्र्यानंतर सर्वाधिक लक्षवेधी ठरलेले वस्तू व सेवा कराबाबतचे (जीएसटी) १२२वे घटना दुरूस्ती विधेयक राज्यसभेत मंजूर झाले आणि त्यातील दुरुस्त्यांसह लोकसभेनेही ते संमत केले.
  • या २० दिवसांच्या अधिवेशनात लोकसभेत १४ विधेयके सादर झाली त्यापैकी १३ मंजूर झाली तर राज्यसभेत १४ विधेयके मंजूर करण्यात आली.
  • उभय सभागृहांत प्रत्येकी २० दिवसांच्या कामकाजात लोकसभेत १२१ तास तर राज्यसभेत ११२ तास कामकाज झाले.
  • काश्मीरमधील तणाव व सद्यस्थितीबाबत उभय सभागृहात गंभीर वातावरणात चर्चा झाली. काश्मिरी जनतेला शांततेचे आवाहन करीत सद्यस्थितीबाबत चिंता व्यक्त करणारा एक प्रस्तावही दोन्ही सभागृहांनी एकमताने मंजूर केला.
  • लोकसभाध्यक्ष सुमित्रा महाजन व राज्यसभेचे सभापती हमीद अन्सारी यांच्या भाषणानंतर संसदेचे कामकाज संस्थगित झाले.

शौचालय निर्मितीत महाराष्ट्र देशात प्रथम

  • राज्यातील नागरी लोकवस्तीची वाटचाल हागणदारीमुक्तीकडे सुरू असून, ‘स्वच्छ भारत अभियानां’तर्गत शौचालय निर्मितीत महाराष्ट्राने देशात प्रथम क्रमांक मिळवला आहे.
  • तर महाराष्ट्रात शहरी आणि ग्रामीण असा संपूर्ण हागणदारीमुक्त होण्याचा प्रथम मान सिंधुदुर्ग जिल्ह्याला मिळाला आहे.
  • महाराष्ट्रात ही मोहीम राबवण्यात आल्यापासून आतापर्यंत शहरी भागात १,६४,८७१ शौचालयांची उभारणी झाली आहे, तर ८८,११७ शौचालयांचे बांधकाम सुरू आहे. 
  • ‘स्वच्छ भारत शहर अभियाना’स महाराष्ट्रात १५ जून २०१५ रोजी सुरवात झाली. या कार्यक्रमांतर्गत राज्यात ८.३२ लाख शौचालये बांधण्याचे उद्दिष्ट ठरवण्यात आले आहे.
  • देशांतर्गत पातळीवर तुलना करताना महाराष्ट्राचा क्रमांक सर्वप्रथम लागतो. महाराष्ट्रात आतापर्यंत १०० शहरे हागणदारीमुक्त झाली आहेत.
  • राज्याच्या नगर विकास विभागातर्फे मोहीम राबवताना लोकसहभागातूनही उभारणी केली जात आहे. यासाठी एका लाभार्थीला जास्तीत जास्त १७ हजार रुपये इतकी आर्थिक मदत केली जाते.
  • यामध्ये केंद्र सरकार ४ हजार, राज्य सरकार ८ हजार रुपयेस्थानिक स्वराज्य संस्था जास्तीत जास्त ५ हजार रुपये इतकी मदत करते. उरलेला खर्च लाभार्थीला उचलावा लागतो. एका शौचालयासाठी २० हजार रुपये खर्च येतो.
सर्वाधिक शौचालय निर्मिती केलेली राज्ये
महाराष्ट्र १,६४,८७१
गुजरात १,५९,३७१
मध्यप्रदेश १,३१,५२९
आंध्रप्रदेश १,२७,७१२
छत्तीसगड ७६,११२

अपडेट्स : रिओ २०१६


विकास क्रिशन यादवचा उपांत्यपूर्व फेरीत प्रवेश
  • भारताचा बॉक्सिंगपटूविकास क्रिशन यादव याने बॉक्सिंगमध्ये उपांत्यपूर्व फेरीत प्रवेश केला असून, आता तो पदकापासून एक सामना दूर आहे.
  • माजी आशियाई सुवर्णपदक विजेता विकासने ७५ किलो वजनी गटात प्रतिस्पर्धी तुर्कस्तानच्या ओंडर सिपल याचा ३-० असा पराभव करत उपांत्यपूर्व फेरी गाठली.
  • रिओ ऑलिंपिकमध्ये बॉक्सिंगमध्ये उपांत्यपूर्व फेरीत पोहचणारा विकास हा पहिला भारतीय खेळाडू आहे.
  • विकासचा उपांत्यपूर्व फेरीत उझबेकिस्तानच्या बेक्तेमीर मेलीकुझीव याच्याशी लढत होणार आहे. मेलीकुझीव हा जागतिक स्पर्धेत रौप्यपदक विजेता आहे.
केटी लिडेकीला चौथे सुवर्णपदक
  • अमेरिकेची महिला जलतरणपटू केटी लिडेकीने ८०० मीटर फ्रिस्टाईल प्रकारात स्वतःचाच विश्वविक्रम मोडीत काढत रिओ ऑलिंपिकमधील चौथे सुवर्णपदक पटकाविले.
  • अंतिम फेरीत तिने ८ मिनिट ०४.७९ सेकंदात ८०० मी. अंतर पार करत विश्वविक्रम नोंदविला. यापूर्वी तिने ८ मिनिट ०६.६८ सेकंदांत हे अंतर पार केले होते.
  • लिडेकीचे या ऑलिंपिकमधील हे चौथे सुवर्णपदक आहे. यापूर्वी तिने २०० मीटर फ्रीस्टाईल, ४०० मीटर फ्रीस्टाईल, ४ बाय २०० मीटर फ्रीस्टाईल रिले प्रकारात सुवर्णपद मिळविले.
  • लिडेकीचे हे ऑलिंपिकमधील एकूण पाचवे सुवर्णपदक आहे. तिने २०१२ लंडन ऑलिंपिकमध्ये एक सुवर्ण मिळविले होते.
फेल्प्सला कारकिर्दीतील २७वे पदक
  • अमेरिकेचा जलतरणपटू मायकेल फेल्प्सने आपल्या रिओ ऑलिंपिक अभियानाचा शेवट १०० मीटर बटरफ्लाय प्रकारात रौप्य पदक मिळवून केला. 
  • त्याने या ऑलिंपिकमध्ये चार सुवर्ण आणि एक रौप्य पदक मिळविले. मायकेल फेल्प्सच्या कारकिर्दीतील हे एकूण २७वे पदक आहे. यामध्ये २२ सुवर्णपदकांचा समावेश आहे.
  • फेल्प्सने या ऑलिंपिकमध्ये ४ सुवर्णपदके मिळविलेली आहेत. त्याने २०० मीटर बटरफ्लाय, २०० मीटर वैयक्तिक मिडले व रिले आणि ४ बाय ४०० मीटर मिडले प्रकार अशी चार सुवर्ण पटकाविली आहेत.
  • या ऑलिंपिकनंतर निवृत्त होणार असल्याचे फेल्प्सने यापूर्वीच जाहीर केलेले आहे. फेल्प्सने २००८ बीजिंग ऑलिंपिकमध्ये आठ सुवर्णपदके मिळविली होती.
नदाल-लोपेझला पुरुष दुहेरीत सुवर्णपदक
  • स्पेनच्या राफेल नदालने मार्क लोपेझच्या साथीने रिओ ऑलिम्पिकमध्ये टेनिसमध्ये पुरुष दुहेरीत सुवर्णपदक पटकाविले.
  • नदाल व लोपेझ यांच्या जोडीने रोमानियाच्या फ्लोरीन मर्जिया आणि होरिया तेकायू यांचा ६-२,३-६,६-४ असा पराभव केला.
  • नदाल आणि लोपेझ हे लहानपणीचे मित्र आहेत. नदालला मे महिन्यात आपल्याला मनगटाच्या दुखापतीमुळे फ्रेंच ओपनमधून माघार घ्यावी लागली होती.

एनपीसीआयचे *९९# मोबाइल ॲप सादर

  • राष्ट्रीय पेमेंट्स कॉर्पोरेशनने (एनपीसीआय) अनस्ट्रक्चर्ड सप्लिमेन्टरी सर्व्हिस डेटा (यूएसएसडी) या प्रणालीवर आधारित *९९# हे मोबाइल अॅप्लिकेशन सुरू केले आहे.
  • हे अॅप्लिकेशन ग्राहकांसाठी उपलब्ध करून देणारी युनियन बँक ऑफ इंडिया ही पहिली बँक ठरली आहे.
  • युनियन बँकेने हे अॅप यूएसएसडी मंचावर अॅड्रॉइड प्रणालीच्या साह्याने लाँच केले आहे. या अॅपचे नाव बँकेने 'युनियन बँक *९९#' असे ठेवले आहे.
  • ग्राहकांना आपल्या बँक खात्यातील शिल्लक रक्कम जाणून घेणे, मिनी स्टेटमेंट पाहणे, पैसे हस्तांतरित करणे असे व्यवहार करणे या अॅपमुळे सोपे होणार आहे.
 *९९# अॅपची वैशिष्ट्ये 
  • व्यवहार करताना इंटरनेटची गरज नाही
  • प्राथमिक खाते व्यवहार करता येणार
  • आधारसंलग्न ओव्हड्राफ्ट व जनधन योजनेतील रक्कम तपासता येणार
  • विविध भाषांत उपलब्ध

मेस्सीने निवृत्ती मागे घेतली

  • अर्जेंटिनाचा महान खेळाडू लिओनेल मेस्सीने जुलै महिन्यात कोपा अमेरिका स्पर्धेच्या अंतिम सामन्यात चिलीकडून अर्जेंटिनाचा पराभव झाल्यानंतर तडकाफडकी जाहीर केलेली निवृत्ती मागे घेतली आहे.
  • २९ जुलै रोजी ‘कोपा अमेरिका’ स्पर्धेतील अंतिम सामन्यात चिलीकडून पेनल्टी शूटआऊटमध्ये झालेल्या पराभवानंतर मेस्सीने निवृत्तीची घोषणा केली होती.
  • अनेक सामन्यांमध्ये अर्जेंटिनासाठी तारणहार ठरलेल्या मेस्सीला अखेरपर्यंत देशाला मोठ्या स्पर्धेचे जेतेपद मिळवून देण्यात यश आले नाही.
  • मेस्सी २००५मध्ये अर्जेंटिनाच्या राष्ट्रीय संघात दाखल झाला होता. त्यानंतर एकाही मोठ्या स्पर्धेचे जेतेपद संघाला मिळवता आले नाही.
  • याउलट बार्सिलोना क्लबकडून खेळताना त्याने बार्सिलोनाला प्रतिष्ठीत 'ला लिगा' स्पर्धेचे ८ वेळा विजेतेपद मिळवून दिले आहे.
 मेस्सीचे विक्रम 
  • अर्जेंटिनाकडून ७२ सामन्यांमधून ५५ गोल. अर्जेंटिनाकडून सर्वाधिक गोल करण्याचा विक्रम.
  • बार्सिलोना क्लबकडून खेळताना ३८० सामन्यातून विक्रमी ३२३ गोल
  • शैली आणि क्षमतेमुळे त्यांची तुलना महानफुटबॉलपटू डिएगो मारडोना यांच्याशी केली जाते.
  • अर्जेंटिनाला २००८मध्ये बीजिंग येथे झालेल्या ऑलिंपिकचे सुवर्णपदक मिळवून दिले.
  • फिफाचा सर्वोत्तम फुटबॉलपटूचा पुरस्कार पाच वेळा मिळवणारा एकमेव खेळाडू

आयआयजीजे संचालक मंडळाच्या अध्यक्षपदी किरीट भन्साली

  • इंडियन इन्स्टिट्यूट ऑफ जेम्स अ‍ॅण्ड ज्वेलरी (IIGJ) संस्थेच्या संचालक मंडळाच्या अध्यक्षपदी किरीट भन्साली यांची नियुक्ती करण्यात आली आहे.
  • तर संचालकपदी नमिता पांड्या, अनिल विरानी, अशोक गजेरा यांची निवड करण्यात आली आहे.
  • नवनियुक्त अध्यक्ष किरीट भन्साली हे प्रख्यात उद्योजक आहेत. तसेच, जागतिक स्तरावरील ‘स्काय जेम्स अँड स्मितल जेम्स’चे भागीदारही आहेत. 
  • भन्साली हे जेम ज्वेलरी एक्स्पोर्ट प्रमोशन काऊन्सिल आणि भारत डायमंड बोर्सचे सदस्यही आहेत.
  • इंडियन इन्स्टिट्यूट ऑफ जेम्स अ‍ॅण्ड ज्वेलरी संस्थेने बीए डिगरी इन ज्वेलरी या अभ्याक्रमासाठी मेवार विद्यापीठाशी सहकार्य घेतले आहे.
  • तसेच, इंडियन इन्स्टिट्यूट ऑफ जेम्स अ‍ॅण्ड ज्वेलरी संस्था सध्या वेलिंगकर इन्स्टिट्यूट ऑफ मॅनेजमेंटच्या सहयोगाने ज्वेलरी व्यवस्थापन क्षेत्रातही संशोधनात्मक अभ्यास करत आहे.

No comments:

Post a Comment